SPAK kërkon arrestimin e saj, Balluku flet para largimit nga detyra: I lamë Shqipërisë vepra, s’kam 300 apartamente, as jahte dhe limuzina
Ish-zëvendëskryeministrja dhe ish-ministrja e Infrastrukturës dhe Energjisë, Belinda Balluku, ka reaguar për herë të parë publikisht lidhur me akuzat e ngritura ndaj saj nga SPAK, i cili ka kërkuar edhe arrestimin e saj. Deklarata e saj erdhi gjatë ceremonisë së prezantimit të Enea Karakaçit në krye të ministrisë që ajo drejtonte.
Balluku vlerësoi punët e ministrisë së Infrastrukturës, duke u shprehur se është krenare për “veprat e lëna në Shqipëri”.
Duke prezantuar ministrin e ri, Balluku theksoi se Karakaçi është pjesë e administratës së ministrisë dhe një shembull për zhvillimin profesional brenda institucionit.
“Enea nuk është shoku im dhe as e kam sjellë unë. Unë e kam gjetur këtu dhe ai duhet të jetë frymëzim për secilin prej jush, sepse tek ai çdo burrë dhe grua në këtë ministri duhet të shohë mundësinë e progresit të vet”, deklaroi Balluku.
Në vijim, ish-ministrja foli për herë të parë edhe për hetimin e nisur ndaj saj, duke theksuar se ka zgjedhur të mos komentojë publikisht çështjen për shkak të natyrës juridike të saj.
“Kam marrë vendim personal që të hesht për një çështje juridike, sepse ajo nuk zgjidhet as në rrjetet sociale dhe as në studiot televizive, por duhet të ndjekë rrjedhën që parashikon Kushtetuta dhe ligji”, tha ajo.
Balluku tha se ka mbështetur vazhdimisht reformën në drejtësi dhe pavarësinë e institucioneve të reja të drejtësisë.
“Drejtësia duhet të jetë e lirë dhe e pavarur. Besoj se drejtësia e re, si produkt i reformës në drejtësi dhe i vizionit për një Shqipëri evropiane, duhet të rikthejë besimin e qytetarëve”, u shpreh ajo.
Ajo shtoi se nuk do të komentojë veprimet e prokurorëve dhe gjyqtarëve, duke theksuar se secili duhet të kryejë detyrën e tij pa u ndikuar nga debatet publike.
“Nuk do të përmend prokurorë apo gjyqtarë. Ata duhet të bëjnë detyrën e tyre, ashtu siç kam bërë edhe unë timen”, deklaroi Balluku.
Ish-zv.kryeministrja mohoi gjithashtu akuzat për pasuritë e saj, detaje që siç është raportuar, kanë dalë nga hetimet e drejtësisë ndaj saj.
“Nuk kam dhe s’kam lidhje me korrupsionin. Nuk kam as 300, as 30 dhe as 3 apartamente. Nuk kam jahte, limuzina, helikopterë apo avionë. Të gjitha këto janë pjesë e një gjyqi publik që bëhet shumë lehtë në këtë vend”, tha ajo.
Deklarata
“Është kënaqësi dhe emocion i veçantë që të jem me ju dhe duhet thënë që çdo rrugëtim ka fillimin dhe fundin e tij. Sot jam këtu për t’i vënë një fund këtij rrugëtimi që kemi bërë së bashku, por me gjurmë të jashtëzakonshme për infrastrukturën. Dua të them që kam qenë me fat që këtë rrugëtim e kam bërë me ju. Burra dhe gra të përkushtuar për të realizuar vizionin e një lideri të madh siç është Edi Rama.
Më vjen mirë që gjatë këtij rrugëtimi jemi përballur me vështirësi sfiduese që na kanë bërë të fortë. Kanë ngritur skuadrën më të mirë dhe më profesionale. Ministria e Infrastrukturës dhe Energjisë është shembull sesi një skuadër ia del të çojë përpara vepra të cilat mendoheshin të parealizueshme. Nuk më ndihmon fare t’ju shoh përballë me emocion. Në krahun tim është ulur një prej jush dhe do desha të thoja dy fjalë sa i përket kapitalit human që për qeverinë shqiptare është aseti më i rëndësishëm dhe i pazëvendësueshëm. Në krahun tim kam ministrin e ri që sapo është betuar.
Unë besoj se çdo çështje juridike nuk zgjidhet as në media sociale, as në banaqe mediatike por duhet të ketë rrjedhën e saj siç e parashikon kushtetuta apo ligji. Kam zgjedhur të mos analizoj, të mos komentoj dhe të jem konsistente në qëndrimin tim sa i takon drejtësisë.
Nëse do t’i ktheheni deklaratave të mia nuk do gjeni kurrë një deklaratë të kundërshtojë tjetrën. Besoj se drejtësia e re do të jetë e lirë dhe e pavarur, si produkt i vizionit të Edi Ramës. Ajo reformë u krye për t’i kthyer besimin qytetarëve te një drejtësi e drejtë. Unë besoj te kjo drejtësi, nuk do anatemoj kur kjo drejtësi prek interesat e mia personale.
Prokurorë e gjyqtarë do bëjnë detyrat e tyre pa ndikuar nga gjyqet publike, nga të pavërtetat apo gënjeshtrat. Hetimi që ka nisur prej muajsh nuk e kam penguar kurrë as në pozicionin tim si ministër apo si qytetare e Republikës. Drejtësia të vijojë të nxjerrë të vërtetën. Nuk kam as 300, as 30 apartamente.
Nuk kam as limuzina as jahte as helikoptere. Të gjitha këto janë pjesë e një gjyqi publik që bëhet me lehtësinë me të madhe këtë por për të thënë të drejtën unë jam rritur me gjyqe publike.
Ndoshta kurrizi ma mban sepse jam trajnuar dhe kalitur që e vogël. Unë di të bëj punën time. Kam ngarkuar qeverinë shqiptare me një peshë që nuk e meriton për shkak të rezultateve që kjo qeveri ka sjellë”-u shpreh Balluku.
