E ngarkuara me Punë e SHBA, Nancy VanHorn ka mbajtur një takim me Bordin e Dhomës Amerikane të Tregtisë.
Ambasada e SHBA thekson se VanHorn dhe përfaqësuesit e Dhomës Amerikane diskutuan se si të rrisin eksportet dhe të krijojnë kushte të barabarta për të tërhequr më shumë biznese amerikane në Shqipëri.
Në një reagim në rrjete sociale, ambasada e SHBA ka zbardhur diskutimet, ndërsa e cilëson Dhomën amerikane të Tregtisë si një urë të rëndësishme midis investitorëve amerikane dhe Shqipërisë.
“Duke përfaqësuar 270 kompani anëtare që gjenerojnë gati 25 përqind të PBB-së “së Shqipërisë, Dhoma Amerikane e Tregtisë në Shqipëri është një urë e rëndësishme midis investitorëve amerikanë dhe Shqipërisë, si dhe një motor për rritjen ekonomike.
E Ngarkuara me Punë Nancy VanHorn iu bashkua dje Dhomës Amerikane për të diskutuar strategjinë e tyre për rritjen e eksporteve dhe investimeve amerikane dhe krijimin e kushteve të barabarta për të tërhequr më shumë biznese amerikane në Shqipëri.”, thuhet në reagimin e ambasadës.
